ວັນທີ 5 ມີນານີ້, ທ່ານ ຫຼີສຽງ ນາຍົກລັດຖະມົນຕີຈີນ ໄດ້ລະບຸໃນບົດລາຍງານ ວຽກງານລັດຖະບານວ່າ: ໜຶ່ງໃນຄາດໝາຍຕົ້ນຕໍດ້ານການພັດທະນາປີ 2025 ແມ່ນ: ລວມຍອດຜະລິດຕະພັນພາຍໃນຫຼື GDP ເພີ່ມຂຶ້ນປະມານ 5%.
ເປົ້າໝາຍດັ່ງກ່າວໄດ້ສະແດງໃຫ້ເຫັນເຖິງຄວາມໝັ້ນໃຈຂອງຈີນໃນການພັດທະນາເສດຖະກິດ 2025, ເພາະມັນເປັນເປົ້າໝາຍທີ່ວາງຕາມສະພາບຕົວຈິງໃນປັດຈຸບັນ ຄື: ການພັດທະນາຂອງເສດຖະກິດໂລກຍັງບໍ່ແນ່ນອນ, ຈາກນີ້ຍັງເຫັນໄດ້ວ່າ: ລັດຖະບານຈີນວາງນະໂຍບາຍຕາມຄວາມຕ້ອງການຂອງສະພາບການ ພັດທະນາເສດຖະກິດ, ພ້ອມທັງນຳໃຊ້ມາດຕະການທີ່ສຸມໃສ່ເປົ້າໝາຍຢ່າງຄ່ອງຕົວ ແລະ ສຸມກຳລັງຊຸກຍູ້ການຈັດຕັ້ງປະຕິບັດໃຫ້ເປັນຮູບປະທຳ ເຊິ່ງໄດ້ສະແດງໃຫ້ເຫັນເຖິງທ່າແຮງທາງດ້ານລະບອບ ແລະ ກົນໄກຂອງຈີນ, ເປັນການຮັບປະກັນດ້ານນະໂຍບາຍຢ່າງແຂງແຮງ ເພື່ອບັນລຸເປົ້າໝາຍທີ່ເຮັດໃຫ້ GDP ເພີ່ມຂຶ້ນປະມານ 5% ໃນປີ 2025. ນອກນີ້, ການພັດທະນາປັນຍາປະດິດ ຫຼື AI ແລະ ການພັດທະນາກຳລັງການຜະລິດໃນຄຸນນະພາບໃໝ່ ກໍຈະເປັນການຄ້ຳຊູອັນແຂງແຮງໃຫ້ແກ່ການບັນລຸເປົ້າໝາຍດັ່ງກ່າວເຊັ່ນດຽວກັນ.
