ພິທີປະກາດຮັບຮອງ ເອົາບ້ານນໍ້າແພດ, ບ້ານເມືອງໝື່ນ, ນ້ຳເລົ້າ, ໂພນສີວິໄລ, ໂນນໄຮ, ນາບົວ, ນາປ່າໄຜ່, ນໍ້າເພີນ, ໂພນງາມ, ນາຕາດ, ນາຍາວ, ນ້ຳຮອນ ແລະ ບ້ານນໍ້າຮີ້ ເປັນບ້ານແບບຢ່າງປະຕິບັດກົດໝາຍ ໃນວັນທີ 5 ມີນາ 2025 ທີ່ ຫ້ອງວ່າການເມືອງໝື່ນ ແຂວງວຽງຈັນ ໂດຍການເປັນປະທານຂອງທ່ານ ສອນໄຊ ຫລວງອາໄພ ເຈົ້າເມືອງໆໝື່ນ, ທ່ານ ຄໍາພັນ ຊະນະໄພ ຫົວໜ້າພະແນກຍຸຸຕິທຳ ແຂວງວຽງຈັນ ພ້ອມດ້ວຍຫ້ອງການ, ອົງການປົກຄອງບ້ານ ແລະ ແຂກຖືກເຊີນເຂົ້າຮ່ວມ.
ທ່ານ ນາງ ຢໍວື່ ຫົວໜ້າໜ່ວຍງານກົດໝາຍ ໂຄສະນາເຜີຍແຜ່ກົດໝາຍ ແລະ ວຽກງານຍຸຕິທຳ ໄດ້ກ່າວວ່າ: ໃນໄລຍະຜ່ານມາ ຫ້ອງການຍຸຕິທຳເມືອງ ໄດ້ສົມທົບກັບອົງການປົກຄອງບ້ານ, ກຸ່ມບ້ານ ແລະ ພາກສ່ວນທີ່ກ່ຽວຂ້ອງ ລົງຕິດຕາມກວດກາ ການສ້າງບ້ານແບບຢ່າງປະຕິບັດກົດໝາຍ ໂດຍ ຮອບທີ II ມີບ້ານນາຕາດ, ຮອບທີ III ບ້ານໂພນງາມ, ຮອບ IV ບ້ານນາຍາວ, ນາບົວ, ຮອບ V ບ້ານໂພນສີວິໄລ, ຮອບ VI ບ້ານນ້ຳເລົ້າ, ຮອບ VII ບ້ານນ້ຳແພດ, ບ້ານເມືອງໝື່ນ, ບ້ານນ້ຳເພີນ, ບ້ານໂນນໄຮ ແລະ ຮອບ VIII ບ້ານນ້ຳຮອນ ແລະ ບ້ານນໍ້າຮີ້ ເຫັນວ່າປະຊາຊົນບ້ານດັ່ງກ່າວແມ່ນໄດ້ຮັບການສຶກສາ ຮູ້ລະບຽບກົດໝາຍຕາມປື້ມຄູ່ມື ທີ່ກະຊວງຍຸຕິທຳວາງອອກ, ເອົາໃຈໃສ່ປະຕິບັດສິດ ແລະ ພັນທະຂອງພົນລະເມືອງຢ່າງຖືກຕ້ອງຄົບຖ້ວນ ຕາມກົດໝາຍ ປະຕິບັດໄດ້ 90%, ປະຊາຊົນມີຄວາມສາມັກຄີ ແລະ ເຂົ້າຮ່ວມໃນການພັດທະນາ ທຸກວຽກງານຂອງບ້ານ ໃຫ້ບ້ານມີຄວາມເຂັ້ມແຂງຂຶ້ນເທື່ອລະກ້າວ ປະຕິບັດໄດ້ 95%, ປະຊາຊົນບໍ່ມີການພົວພັນຄ້າຂາຍເຖື່ອນ, ຢາເສບຕິດຢ່າງຮ້າຍແຮງ, ບໍ່ມີການຂີ້ລັກ ແລະ ເປັນໂສເພນີ ທີ່ລະເມີດກົດໝາຍ ປະຕິບັດໄດ້ 85%, ປະຊາຊົນພາຍໃນບັນດາບ້ານກວມອັດຕາສ່ວນ 95% ຂອງຈໍານວນຄອບຄົວ ທີ່ມີຄວາມເປັນເຈົ້າການສະກັດກັ້ນ ບໍ່ໃຫ້ມີຂໍ້ຂັດແຍ່ງເກີດຂຶ້ນພາຍໃນບ້ານ, ເປັນເຈົ້າການແກ້ໄຂຂໍ້ຂັດແຍ່ງທີ່ເກີດຂຶ້ນ ດ້ວຍການປະນີປະນອມຢ່າງສັນຕິວິທີ ປະຕິບັດໄດ້ 95%, ອົງການປົກຄອງບ້ານ ໄດ້ປັບປຸງແບບແຜນວິທີເຮັດວຽກ ແລະ ຫັນການບໍລິຫານວຽກງານ ໄປຕາມລະບຽບກົດໝາຍເທື່ອລະກ້າວ, ຄະນະແກ້ໄຂ້ຂໍ້ຂັດແຍ່ງບ້ານ ກໍມີຄວາມເຂັ້ມແຂງ ສາມາດແກ້ໄຂບັນຫາຕ່າງໆໃຫ້ໝົດໄປ ປະຕິບັດໄດ້ 90%. ໃນ 1 ປີຜ່ານມາ, ປະຊາຊົນ ແມ່ນບໍ່ມີບຸກຄົນໃດ ຖືກດຳເນີນຄະດີຢ່າງຮ້າຍແຮງ ຕາມຂະບວນຍຸຕິທຳ ປະຕິບັດໄດ້ 100%.
ໂອກາດນີ້, ທ່ານ ສອນໄຊ ຫລວງອາໄພ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານໃນໄລຍະຜ່ານມາ ພ້ອມທັງຮຽກຮ້ອງໃຫ້ຄະນະພັກຮາກຖານບ້ານ ຈົ່ງສືບຕໍ່ເອົາໃຈ ໃສ່ສຶກສາອົບຮົມການເມືອງ-ແນວຄິດ ໃຫ້ປະຊາຊົນບັນດາເຜົ່າຢູ່ພາຍໃນບ້ານຂອງຕົນ, ປັບປຸງກົງຈັກການຈັດຕັ້ງບ້ານ ໃຫ້ມີຄວາມໜັກແໜ້ນ ເຂັ້ມແຂງທາງດ້ານແນວຄິດ, ການຈັດຕັ້ງ, ແບບແຜນວິທີເຮັດວຽກໃຫ້ຖືກຕ້ອງ ແລະ ສອດຄ່ອງຕາມກົດໝາຍຢ່າງເຂັ້ມງວດ, ເພີ່ມທະວີຄວາມສາມັກຄີປອງດອງພາຍໃນບ້ານ, ສ້າງບ້ານໃຫ້ມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ຍຸຕິທຳ.